- रिदुम् खिम् - September 22, 2025
- स्तुति भजनः पारु र निनाम् रिदुम् - September 4, 2025
- कुलुछाआ मःम् कोयो - August 8, 2025
सोम्छा दानाइ लोलिसि, कुयामा मायामाचि दानाइ लोलिसा, उतोङ्नाइ कुयामा मायामा सोक्से पिःम् सुम्नि रिङ् सुम्नितुम्लो पिकेः । कुयामा मायामाचि सोक्साम् लो मोबोछाआ सुम्नितुम्लो खम् बोक्से । चुबिमा, सुखा, हिल्वा, थोमे, मोमो चाउ, बुक्ति चाउ सोक्साम् लो सुम्नितुम्लो खम् छुवे । नुकपु सुम्नितुम्लोम् छिःदुलु छाम्पा तुवे । खोरोलोइ सुम्नितुम्लो बाइप्सिवा छुकसा खोलोक रिङ् इक्दिम्पि युन्ला तेक्नो । खन्सा उककइ सोक्साम्, खङ्कम् ङाङ् सुम्नितुम्लो खम्खाम् छुवे –
पारुपा लो हुतिलिप्आ छिर्मा गुलो गुलो लःपा लोलिस्चि लो छिर्मा गुलो गुलो लःप् ने मान्यिङाना रिचिफालु लोदुइचि लो रिचि वादि लोलिसा ऽ खङ्कखाप्का रिचि वादिन् छिलुमा तोङ् योयिङाचा ऽ छिर्मा गुलो मान्यिङा थे ऽ खाङा थेना पारुपा नाइसाना वादाप्स्बोक्स् लो रिचि वादिम् काम् बोहो लो जाखिल् बोहो योयुवाक ऽ बाकापुम्मा यामचिना छिर्मा गुलो गुलो लप्ये ऽ लोलिसाव लोदुत्तो योवाना हुरिना छेर्कुम्लुला लोलेन्चि लो छेर्कुम्लुमि दोरिमापु दिरित्तिमि छोछापि योयिङाक बाइरिप्चोये लोलिसाना दिरित्तिपु वाथुक्सा हो उम् खल्जम्माये वाखेता थे ऽ खङ्कखाप्का कुहुमाये वापेःराना थुनाम् गोपा वाकाम्खान्चि ऽ बाइरिप्चो सि पुछोमाछा कुहुमा लो योयिङाक होहोरेम्ये लोलिन्खान्चि ऽ खाङा थेना होहोरेम्मि हारिवाये योबानाना उम् सुरिलाप्छा दुबान्चा लो सुरिकाम्मा काम्मा लप् ने मान्यिङा थे ऽ खाङा थेना तुप्सि गोपा काम्मा लःप् कुहुमाछा खुइगि साम्आ सुरि वाहउ लोदुइ लोये कुहुमा ङाइ सुरि काम्मा काम्मा ल थे ऽ
खङ्कखाप्का कुहुछाये होहोरेम्आ मोरि म थे मोमुन् थे लो होहोरेम्मि सागोछा ने वादिकु हिकायो चाउ, चुबिचाउ योबिचाउ छेस्कु फोलोमा चाउ, सुखा, हिला चाउ, मोमोचाउ बुक्तिचाउ, थोथोरि थोरिमे चाउ, साहुम्ति हुम्तिमो चाउ, दोवोचाउ, केत्वार् चाउ योयुवा लोने उम् मा यो चुनुमामि वारेयोपि वाछेयोपि मान्यिङा थे ऽ
खाङा थेना ऽ कुयामाचि ऽ मायामाचि ऽ सानिवाये ऽ नाइसाना ऽ होहोरेम् उम् मा चुनु ऽ चुनुबुम्आ ऽ निनाम् काम्स्को ऽ याकाम्स्कोये ऽ दिदिखाम् तेल् ऽ पिलाप्छेम् तेल् ऽ बायाखाये ऽ खाप्तोङ्माये ऽ कुया तेल्पा ऽ योयिङानि ऽ ओ मिकु मुक्छे ऽ लोरिनिन ऽ लोदुइचि थे ऽ
छारुइछाचि बुः, पप्पउ, खासायोचि योयुवाना दोसम्मापि चिन्चो लागालि लो रिदोमाछा निनाम्माछा रिदुम्माछा योयुवा थे ऽ खङ्कखाप्का निनाम्मा ने रिदुम्मा ने सानिमिछा निउमिछा योयिङाक ऽ
निनाम्मा रिदुम्मा सो उम् सुरि लाप्छा योबाना लो कुहुमा ङाइ सुरि वाहउ लोदुइ लोने होहोरेम्मा उम् मा यो चुनु बुम्मा वारे लना कुहुमा ने आम् पायो रोबुइ के सुरि वाहउ लोदुइनव ऽ सिकि लना सवे लना सितोपुलु ङोङ्ङोक्छेये सिकि हुम्मा यामिना सुरि वाहउ लोदुइ खोङ्व लोदुइ थेना निनाम्मा रिदुम्मा ने सिकि लतो सवे लना सितोपुलु ङोङ्ङोक्छे ङाइ सिकि हुम्मा यामिना सुरि वाहउ लोदुइ लोने सितोपुलुङ् योयिङाचा ऽ
खङ्कखाप्का उम् मा चुनु चुनु बुम् ङाइ देना मुयो सितोपुलुन् ङोङ्ङोक्छे ङाइ योयिङ्चाइ के लोदुइ थे लो साचिङ् खेप् सो दिलिङ् खेप् सो सिकि हुम्मा यामिखोङ् ते लोदुइ थेना निनाम् रिदुम् रिदुम्माआ सिकि हुम्मा यामि थेना सुरि वाहउ लोदुइ लो ने साचिङ् खेप् ने दिलिङ् खेप् ने दिबुमि हो साप्दो गोपा दिबु लसि रुवोःङ्खाता ऽ
खङ्कखाप्का निनाम्माआ रिदुम्माआ निनाम्माप्तो रुवोबु सिलावाये सुरि वाहउ लोदुइच थे ऽ खोदोतोः लो सुरि वाहउ लोदुइ कने चिन्चोलिआ लागालिआ युयेःन् थे हो सामा बुम रोबि बुम खिदि लाम्चाम् चोचुमोव ऽ निनाम्माप्तो रुवोबु सिलावा दाला मःस रुवोङोः के लोदुइ थे ऽ खोदोतोनाङ् निनाम्माआ रिदुम्माआन् खिदि लाम्चाम् चोचुम् थेना रुवोबु दाला मसि रुवोःङा लो रुवोबु ने बेलेछि हो बेले लःस् रुवोःङ्खाता ऽ बेलेवापि मान्यिङा थे ऽ
पारुपाये एन्दाक्पाये मिरि तोहु तोहु बतो उम् बेलेवापि योछा म थे योयिङा थे ऽ खोदोतोलो चिन्चोलिआ लागालिआ निनाम्माआ रिदुम्माआ सुरि दाला दाला मस्ये वापोक्सोक वापिक्तो पारुपाये लोदुइ थे लो निनाम्मा रिदुम्मा ने ङायि सेमा सेमाछाये योयिङ्चाइक ऽ कोःङा पारुपा ने सिसम् खल्जम् खल्जप्पाये रिसिआ सो नाइयोप् ऽ ङायिआ सो नाइयोप् वापिका थे ऽ खोदोतोलो सायोबुप निपा बुप आन् ङाइ चामा होसा चामा लक दुमा होसा दुमा लक निसि लक सम्से लक लोदुइ थे ऽ
खोदोतो दो निनाम्मा ने रिदुम्मा ने ताकि सल्मा चुकु हुक्छो दोखुर्ना उम् मिकुपि लोरिस्व लोदुइ थे ऽ खाङा थे नान् चिन्चोलिआ पारुपामि हुक्छोये दोखुर्तोये निनाम्मापु रिदुम्मापु योयुत्ना उम् मिकुपि लोरितो निनाम्माप्तो रुवोबुने बेलेछि हो बेले लसि रुवोःङ्खाता उम् बेलेवापि मान्यिङाना पारुपाये एन्दाक्पामि चुकु हुक्छो दोखुरुना योयुवो के ऽ देनातकइ निनाम्माआ रिदुम्माआ मिकु मइ दो मुमेर दो निसि लइ दो सम्से लइ दो कोङा दाला दाला मसि याथोङाव लोदुयो के लोदुइ थे ऽ खङ्कखाप्का पारुपामि एन्दाक्पामि चुकु हुक्छो हुक्छोयो ने मिकु मना मुमेर्ना निसि ल थे सम्से ल थे ऽ
खङ्कखाप्का पारुपा एन्दाक्पा दाला मसि दालासि चिन्चोलि ने रुवोःङा लो पारुपाआ नेम्लालुस्चि नेम्सालुस्चि दुबायोःनो दो ओलोनु ते वापिका थे ऽ खाङा थेनान् पारुपामि बुवापिक मिरि तोहु तोहुयोपि चोलु म थे चोचुम्चि थे ऽ खाङा थे नान् चिन्चोलिआ लागालिआ सेल् बनाम्आ माल् बनाम्आ लोनाप् थेना बोतोछुपि दोखुर्तोये योयुत् थे ऽ
खाङा थे नान् निनाम्मामि रिदुम्मामि दिरिछुये छुन्तोनिपा तोलु म थे तोतुइ थेना पारुपा एन्दाक्पा ने आम् बुवापि योयुतु के लोदुइ थे ऽ खाङा थे नान् निनाम्माआ रदुम्माआ लाम्चिको फोलोङ्गामि हेर्छा लाम् मिकु म थे मुमेर् थे ऽ खोदोतोलोन् पारुपाये एन्दाक्पाये सिसम् खल्जम् खल्जप्पाये ङायिमि सो नाइयोप्ये योछा म थे योयिङाक निनाम्मआ रिदुम्माआ पारुपा ने एक्दाक्पा ने चामा होसा चामा लइ नो दुमा होसा दुमा लइनो निसि लइ नो सम्से लइनो वापिका थे ऽ
खाङा थे नान् पारुपा एन्दुक्पा ने सायोबुप निपा बुप चिन्चोलि ङ लागालि ङ आनानेसे नेइम्लालु नेइम्सालुपि योयुक्सो के ऽ ओ बेलेवाप्तो खाप्चायुप्तो वाछोक्सोव लोदुइ थे ऽ खाङा थेना पारुपाआ योक्स्तो बोउपि पारु लासइ योयुक्स्युक्स् थे ऽ
खाङा थे नान् खासायो, बुमि, खिसाप्पाआ रिसि तोसा पारुपा एन्दाक्पा ने मिरि तोहु तोहुयोपि चोलु मस् थे चोचुप्स्चिना सेल् बनाम्आ माल् बनाम्आ लोनाप्तोये बोतोछुपि दोखुर्चिना बेलेवाप्तो वाछोक्स्चि थे ऽ खोदोतोलो बुमि चाकापइये वातेर्सा थे ऽ बोतोछुप् तो वालत्ता थे ऽ खासायोमि दोसम्मापि वातेम्माये यामि थे ऽ खिसापा चोन्दोक्पामि उम् खिङ् ङाये वाखेता थे ऽ
खङ्कखाप्का हावामि लेम्कर्मिआ सोक्वाये मोर्वाआ बेकुवा सोरि म थे सोसिप् थे हो निनाम्मा ने रिदुम्मा ने सागो थर्मा खरे थर्मा दुबाना थे ऽ खाङा थे नान् हाकखापि बेकुवास्चि योछा मइ म, योयिङ्चाइ म वापिक्तोये निनाम् रोखो मोक् रोखो दुबाना थे ऽ खोदोतोलो चिन्चोलि लागालिआ उम् दोपेर्छोआ योक्स्तो बोउपि पारु लासइ वाचि थेना मिकुवापा वारिस् थे के ऽ
खोदोतोलो निनाम्माआ रिदुम्माआ रोबिबुम सामाबुम हाकखापि ओदोतोलो बेकुवास्चि योछा मइ म योयिङ्चाइ म वापिका थे ऽ खोदोतोलो सामा बुम रोबि बुम ओ रिसि साम्दि योयुक्स दो बेलेवापि बेकुवा ने योछा मइक योयिङ्चाइ के वापिका थे ऽ खोदोतोलो निनाम्माआ रिदुम्माआ रिसि साम्दि योयुक्सोः के वापिका थे ऽ खाङा थे नान् योक्स्तो बोउपि पारु लासइ निनाम्मा रिदुम्मा ने वापइ थे के ऽ
खङ्कखाप्का बेकुवा ने हावामि लेम्कर्मिआ बेलेवाला योयुत् थे के ऽ खाङा थेना निनाम्मा ने रिदुम्मा ने पारु लासइ वाछा म हो वालक्खिना दुवा नाम्न नाम्नचा थे ऽ
दोसम्मापि निनाम्मा ने रिदुम्मा ने दुवा जाक्सि खति जाक्सि सवे जाक्सि योयुवा थे ऽ खाङा थेना खान्दिरि दुबाना लो ङोर्कोवास्ये छेचिलु लुलेन्तो नेवाखा हेम् दोरि मन्चि दोआन्चिक निनाम्मा लो रिदुम्मा लो बितुपाना कोङायोने दुवा जाक्सि खति जाक्सि सवे जाक्सि दुबानोःक आन्नियोस्चि बोबि मःप्चि चाम्लु मःप्चि योयिङ्नि यो वापिक्तोये वातत्चि लो निनाम्मा ङ रिदुम्मा ङ अङ्कपिने बोबिमिने योयिङेःकानो ऽ छेचिलुप्तो बोबि मःप्ने चाम्लु मःप्ने योयिङ् के लोदुइचि थे ऽ
खोदोतोलो चिन्चोलिआ लागालिआ सामा बुम रोबि बुम देनाहोनाइ ओदोतोना ङायि जाक्सि पुसि जाक्सि योयुचाइ म लोदुइ थे लो ओ रोबिबुम सामाबुम चिन्चोलि ङ लागालि ङ दुवा जाक्सि योयुवोः के देनाहोनाइ यामयोङ्चुङ् ऽ तोबु लासइ रिरि लासइ छेचिलुप्तो रुवनोए ऽ छेचिलुप्तो आसायो सेलेयो बोबि मःपा चाम्लु मःपा योछा मःये योयिङ्चाइ म वापिका थे ऽ
खाङा थे नान् निनाम्माआ रिदुम्माआ खाप्चिफा लो छेबेफाये चिन्चोलिमि लागालिमि चुकुहुपि वापि थेना चिन्चोलिआ बायाकेर् सिलावाप्तो तोबु लासइ रुवन् थे ऽ खोदोतोलो बायाकेर् सिलावाआ कोङा ने बोबि मुनो चाम्लु मुनो ऽ बायाकेर् थुलुलुआ बोबि मइ यो चाम्लु मइयो वापिका थे ऽ बायाकेर् थुलुलुप्तो रुवन् थे लो कोङा सोये बोबि मुनो चाम्लु मुनो वापिका थे ऽ बायापइवा वापइवाप्तो वाखात् खोङ्व लोदुइ थेना बायापइवा वापइवाप्तो रुवन् थे लो कोङानेसे बोबि मुनो चाम्लु मुनो साप्दोपइवा अम्निवाआ बोबि मइयो चाम्लु मइयो वापिका थे ऽ
खाङा थे नान् साप्दोपइवा अम्निवाप्तो रुवन् थे लो साप्दोपइवा अम्निवाआ कोङानेसे बोबि मुनो चाम्लु मुनो ऽ खोसोवा हिरिम्बुम्तो वाखात् खोङ्व वापिका थे ऽ खोसोवा हिरिम्बुम्तो रुवोःङा थे लो कोङानेसे बोबि मुनो चाम्लु मुनो ङाल्वा हापेर्वाआ बोबि मइ यो चाम्लु मइ यो वापिका थे ऽ ङाल्वा ङापेर्वाप्तो रुवोःङा थे खोदोतोलो बोबि मुनो चाम्लु मुनो छिलुपोउ अययम्आ बोबि मइ यो चाम्लु मइयो वाखात् खोङ्व वापिका थे ऽ खोदोतोना छिलुपोउ हययम्तो रुवोःङा थे ऽ खोदोतोलो छिलुपोउ अययम्आ कोङाने बोबि मुनो चाम्लु मुनो नेतोक बोक्चेन्दुये चेन्दुक्पाआ बोबि मइ यो चाम्लु मइयो वाखात् खोङ्व वापिका थे ऽ
खाङा थे नान् बोक्चेन्दु चेन्दुक्पापि रुवोःङा थे ऽ बोक्चेन्दु चेन्दुक्पाआ सो नेतोक तोवाना केलेनाआइ बोबि मइयो चाम्लु मइयो वापिका थे ऽ खाङा थे नान् तोवाना केलेनापि रुवोःङा थे खोदोतोलो तोवाना केलेनाआ सो कोङाने बोबि मुनो चाम्लु मुनो ऽ सापाबुप निपाबुप नेतोक साप्तोवा तुतोवाआस्चि बोबि मइ यो चाम्लु मइ यो वाखात् खोङ्व वापिका थे ऽ खाङा थे नान् साप्तोवाप्तो तुतोवाप्तो रुवोःङा थे ऽ साप्तोवाआ तुतोवाआ सो कोङाने बोबि मुनो चाम्लु मुनो नेतोक कुमुछि युकुछिआइ बोबि मइ यो चाम्लु मइ यो वापिका थेना कुमुछिप्तो युकुछिप्तो रुवोःङा थे लो कुमुछि युकुछिआ सो कोङा ने बोबि मुनो चाम्लु मुनो वापिका थे ऽ छिरिमि तोतुमिआइ बोबि मइयो चाम्लु मइयो वापिका थे ऽ खाङा थेनान् तोतुमिपि रुवोःङा थे ऽ खोदोतोलोन् छिरिमि तोतुमिआ कोङानेसे बोबि मुनो चाम्लु मुनो नेतोक योउना हुरिनाप्तो मोउमि कुरुमिआये बोबि मय चाम्लु मय वापिका थे ऽ
खाङा थे नान् मोउमि कुरुमिप्तो रुवोःङाना आनायोचि बोबि मइ यो चाम्लु मइ यो लोदुइ लो ने मोउमि कुरुमिआन् कोङायोने बोबि मुयो चाम्लु मुयो वापिका थे ऽ
खङ्कखाप्का चिन्चोलिआ लागालिआ निनाम्मामि रिदुम्मामि खाप्चिफा लो छेबोफा लो उम् बुवापि तोबु लासइ योयुक्स् लोने मोउमि कुरुमिआन् खाप्चिफा लो, छेबेफा लो, छिर्माकु लो चोन्दोकु लो, सिप्खाचो लो खामाचो लो, आल्मारिम् लो तोयोरिम् लो, साप्दो सुइम् लो मिरि सुइम् लोये बोबि मुयो चाम्लु मुयो लोदुइ थे ऽ
खङ्कखाप्का चिन्चोलि ने लागालि ने उम् बेलेवा खाप्चायुला दोरि म थे दोआन्चिना निनाम्मापु रिदुम्मापु उम् बुवापि लोरेपा थे ऽ खाङा थे नान् मोउमिआ कुरुमिआ खाप्चिफा लो, छेबेफा लो, छिर्माकु लो चोन्दोकु लो, सिप्खाचो लो खामाचो लो, आल्मारिम् लो तोयोरिम् लो, साप्दो सुइम् लो मिरि सुइम् लो बोबि मुयो चाम्लु मुयो वापिका के ऽ निनाम्मा ने रिदुम्मा ने लोदुइ थे ऽ
खाङा थेना निनाम्मा रिदुम्माआ खोलो चुम्मा यामि थेना चिन्चोलि ने लागालि ने बेलेवाला वापोक्स् थे के ऽ खङ्कखाप्का चिन्चोलिआ लागालिआ मोउमि कुरुमि बुवापिये लोरेपाना निनाम्मा ने रिदुम्मा ने देनाहो नाइ ङायि जाक्सि पुसि जाक्सि खते जाक्सि सवे जाक्सि योयुचाइ म खतिछाबउ दुबाइचये वापिक्तो दुवा नाम्न रिसि नाम्न नाम्नतो तोबु लासइ रिरि लासइ मोउमि कुरुमिपि बुछा गोपि योयुक्स् नाने मोउमि कुरुमिआ बोबि म लो चाम्लु म लो ऽ निनाम्माआ रिदुम्माआ पारु छा एन्दाक्पा छाइ मोरि मइक मोमुन्कइ खतिछाबउ दुबाना थे ऽ
खाङा थे नान् चिन्चोलि लागालि ने खङ्क साम्दि सानपा योयुक्स् थेना बेलेवा लाम् दोरि म थे ऽ दोआन्चि थे ऽ खाङा थे नान् निनाम्मा रिदुम्मा ने सामा बुम रोबि बुम आनानेसे पारु छाये एन्दु छाये मोरि मइक मोमुन्नक योउना हुरिनाप्तो मोउमि कुरुमिआ बोबि चाम्चे खतिछाबउ योयुत् के लोदुइ थे लो निनाम्माआ रिदुम्माआ देनाहोनाइ यामोयोङ्चुङ् वापिका थे ऽ खाङा थे नान् चिन्चोलि लागालि ने पारुपाप्तो एन्दाक्पाप्तो रुवोःङाना पारुपा एन्दाक्पा ङ निनाम्माआ रिदुम्माआन् आम् चारिछाये वाहुछाये मोरि मइक मोमुन्नक योउनाप्तो हुरिनाप्तो मोउमि कुरुमिआ खतिछाबउ योयुत् के लोदुइ थे लो पारुपाआ एन्दाक्पाआ ओलोनुव लोमोनुव ऽ निनाम्मा रिदुम्माआ ओ चारिछा वाहुछाये मोरि मय मोमुन्न दो लाइस्पि निनाम्मामि रिदुम्मामि सागो चेइम् ने रुद्र, गोङ्गेर्वा, तितिछोरो थोक्थेर्वा, सेर्बोचि योयुचाइ के ऽ खङ्कमि दोसम्मापि सोक्वा मोर्वाये योयुचाइ के ऽ खङ्कम् दोसम्मापि तुप्सि गिलुचिये योयुचाइ के ऽ खङ्कम् दोसम्मापि उम् सोःम् लोक पियेयेःम्छा, चयम्माछा, बोस्माछा योयुचाइ के ऽ
खङ्कम् दोसम्मापि बुसुम्छा लाम्लछा नार् होङ्छाये योयुचाइ के ऽ खङ्क बुसुम्छा लाम्लछा नार् होङ्छाक तुप्सि गोपा गिलु गोपा चारि थिङ्मा बुछा मनु योयिङ्चनु ऽ खङ्कमि दोसम्मापि बुसुम् लुम्दुछा मोक्स् होङ्छा योयुचाइ के ऽ लुम्दुछा मोक्स् होङ्छाक तुप्सि थेम्तो गिलु थेम्तो तुप्सि चेइमा यामिन्चिनुना उक्ति लनु ममु लनु ऽ खङ्कमिये दोसम्मापि लुम्दुछा पुपो होङ्छा योयुचाइ के ऽ पुपोहोङ्छा छारुइयो लुम्दुछाक दाम्रोमापा सिसम्मापा वाखेम्चिनुना उक्ति लनु ममु लनु ऽ खङ्कमि सो दोसम्मापि छाइरुछा रिदोछा मिना ङालि तुम्नोछाये योयुचाइ के ऽ छारुइछा रिदोछा तुम्नोछाक उम् मामि चुचुमामि बुवापि योछा मःप् योयिन्चानु ऽ कोङा मिरि खेमु वालेनोओ ऽ खङ्कपि उम् मा चुना निनाम्मा रिदुम्माआ वाकप्नुना ओ बेलेवाप्तो योयिङोः लो ओ मिकुपि लोरिस्नुव ऽ पारुपाआ लोदुइ थे ऽ
खङ्क साम्दि खङ्क रिसि योयुत्ना चिन्चोलि लागालि ने बेलेवाला दोरि मन्चि दोआन्चि थे ऽ खाङाथेना खङ्क रिसि निनाम्मा रिदुम्मा लोदुइ थे ऽ खङ्कखाप्का निनाम्माआ रिदुम्माआ खङ्क साम्दि खङ्क रिस योयुक्स् थेना मोउमिआ कुरुमिआ बोबि लासइ खतिछाबउ यामक तोङ्ङा निनाम्मा रिदुम्माआ पारुछाचि मोरि म थे मोमुन् थे ऽ खाङा थेना दोसम्मापि मिना पोङ्खा हाल्कुम्बुपि मिना ङालि तुम्नोछा योयुवा लो पारुपाए एन्दाक्पाआ मिरि खेमु लोलेन्कपि निनाम्माआ रिदुम्माआ वाकःप् थेना पारुपा ने बेलेवा याथोङा लो पारुपामि एन्दाक्पामि मिकुपि लोरिस् थे लो पारुपाआ उम् छारुइछा तुम्नोछा ने हारे हासे यामिः थे ऽ
खाङा थेना नार् होङ्छा, मोक्स् होङ्छा, पुपो होङ्छा, तुम्नोछामि हारिवा सो दुबाना थे ऽ खाङा थेना नार् होङ्छा लो तुम्नोछा दिबुपा हो सुलोपा हो तुप्सि गोपा गिलु गोपा दिबु लःस्ये रुवोःङा थे ऽ खोदोतोलोन् नार् होङ्छा ने दोसुम्पि योयिङाना तुम्नोछामि दिबु जोस्ये वाछा म थे वालक्खि थे ऽ
खाङा थे नान् तुम्नोछाआ निनाम्मा ङ रिदुम्मा ङ ओ मायो चुनु बुम बुसुम्बु लाम्लबु ने तुप्सि गोपा गिलु गोपा दोसम्पि योयिङ्चाइना ओ दिबु जोस्ये वाछा मय वालक्खिय खोदोतोना सेक ललइ दिमा ललइ लोदुइचए वापिका थे ऽ खाङा थे नान् निनाम्माआ रिदुम्माआ नार् होङ्छा ङ बुसुम्छाप् लाम्लबु ङ आनानेसे दिबु खापा सुल खापा दोसम्मापि योछा मइना आम् रोबियोमि दिबु जोस्ये वाछा मइ थे वालक थे ऽ आम् रोबियोचा खङ्क रिस दुबाइयचि के ऽ ङायि लव ङाचि लव लोदुइ थे लो ओ मायो चुनु बुम खङ्क रिस ओ रोबि सापायोचिम् नेम्लालु के नेम्सालु के वापिका थे ऽ
दोसम्मापि दिबु लस् रुवोङा लो सो नार् होङ्छा ने तोदुछाप् ने दोसम्पि ङाइ योयिङा लो होहोरेम्मि सागोवाप्का लोलिन्चिक सुखापाआ नाइमेआ सानिवाछो यामिकसा उम् सानिया सो बेलेवापि मान्यिङाना उम् रोबि सापायोमि दिबु जोस् ने वाछा मखि वालक्खि थे ऽ खङ्कखाप्का तुम्नोछाआ नार् होङ्छा ने उम् तालिफुआ होबेर् सेत् थे ऽ
खाङा थेना तुम्नोछा ने उम् बेलेवाला खाप्चायुला दोरि मन्चि दोआन्चि थे ऽ खोदोतोलो निनाम्माआ रिदुम्माआ आम् रोबि सापाबुप्क हाकखापिइ योयिङ्चाइ म लोदुइ थे लो रोबि सापा बुप् ने दोसम्मापा योछा मइ के योयिङ्चाइ के वापिका थे ऽ खाङा थे नान् ओ छायो सिसम्बुप खङ्क रिस आना रिस दुबाइक ने नेइम्सालु के नेइम्लालु के ऽ हाकखापिइ आम् रोबि सापायो ने होबेर् सेःतु लोदुइ थे लो ओ दिबु जोस्ये वाछा मखि वालक्खिना तुप्सि गोपा गिलु गोपा ओ होबेर्सेतु वापिका थे ऽ
खाङा थे नान् निनाम्माआ रिदुम्माआ तुप्सि गोपा गिलु गोपा सोरि मक सोसियाक नार् होङ्छामि सालोगि ने वोतो सेप्आ वाबप् थेना दुवा नाम्न नाम्न रिसि लोदुइच थे ऽ खोदोतोलो नार् होङ्छा ने मामा बुम चुनु बुम उक्ति लोःक ममु लोःक वापिक्तोये वापका थे ऽ
खाङा थेनान् निनाम्माआ रिदुम्माआ आम् रोबि सापा बुप्मि दिबु जोस्ये वाछा मना वालक्खिना होबेर् सेःता खङ्क रिस लोदुइ थे लो मामा बुम चुनु बुम खोदोतोदोन् ओ रोबि सापायोचिम् बुवापिने लोरिम्चिम् ने ङायि लोःयो ङाचि लोःयो ऽ तुप्सि गोपिङ् गिलु गोपिङ् योछा मुयो योयिङोः के ऽ लोदुइ थे लो निनाम्माआ रिदुम्माआ ओ छा यो सिसम्बुप तुप्सि गोपिङ् योयिङ्चाइ दो कोङाने देना होनाइ यामोयोङ्चुङ् लोदुइ थे ऽ
खोदोतोलो मामा बुम चुनु बुम लाम्दुनिये कोकुसोः दो वालाम्छिनि दिबुसाचि वालाम्चए ऽ वालाम्छिनि कोकुसोः दो लाम्दुनिये दिबुसाचि वालाम्चए लोदुइ थे कन् लाम्दुनि कोकुसा लो ओ छा यो सिसम्बुप वापिक्तोये लाम्दुनि ङाइ रुवोःङा थे ऽ वालाम्छिनि कोकुसा लो ओ छा यो सिसम्बुप वापिक्तो वालाम्छिनि ङाइ रुवोःङा थे ऽ
खाङा थे नान् नार् होङ्छा ने ओ मायो चुनु बुमा ओ दिबुवाये वाखाङोः उम् सानपा योकेत्ताना उम् मायो चुनु बुम् सो वालाक्सोः यामिना लो गन्दिरिपि वाहेल्दित् थे ऽ खोदोतोलो होहोरेम्मि सागोवाप्का योयुवाक सुखापा सुराप्पाये निनाम्मा रिदुम्मा ने वादःत्खिना सोरि मखि सोसेत्खि थे ऽ खोदोतोना खङ्कखाप्क सुखायोआ निनाम्मा सो रिदुम्मा सो याथाम् थेना तुप्सि गोपा गिलु गोपा सोरि म थे सोसिया थे ऽ
खङ्कखाप्का नार् होङ्छाआ उम् मा चुनु चुनु बुम्मि सालोगि ने मोक्स् होङ्छाये वाहुङ्दोङ्व लोदुइयुक्स्ना तुम्नोछा दाला मसि दालासि वाखाता थे ऽ
खोदोतोलो होहोरेम्मि सागोवाप्का योयुवाक सुखापाआ मोक्स् होङ्छा सो वादःत्खिना उम् मा चुनु चुनुबुम्मि सालोगिने सिङ्दाप्पा लुङ्दाप्पा यामना वाछा मखि वालक्खि थे ऽ
खङ्कखाप्का तुम्नोछाआ इ मा चुनु चुनु बुम्मि सेक तुम्ते सिम् ललइ गुस् ललइ ङा यामियाम् के वापिकाना सेक तुम्ते चोचुम्चिना मोक्साप्पाआ वाहुङ्कपा तुम्नोछा लो नार् होङ्छा लो दोआन्ता लो मोक्स् होङ्छा ङाङ् योयिङा थे ऽ निनाम्मा रिदुम्मामि सालोगि ने मान्यिङा थे ऽ
खाङा थेना इ मा चुनु चुनु बुम्मि सालोगिक हाकखापिइ योयिङ्चाइम लोदुइचि लो मोक्स् होङ्छाआ आचित्त के ऽ बुसुम्छा नार् होङ्छा लो दिबु लःस्ये रुवोङाक वापिक्तोये खङ्क रिस कुहु रिस दुबाइ थे ऽ
तुम्नोछाआ मोक्साप्पामि बायाखा खाप्तोयोपा उम् मायो चुनु बुम्मि ताकिवा लो मिना हि लो उम् मिकुपि लोरिसाना उम् रोबि सापा बुपा मोक्साप्पाआ सेक ललइ दिमा ललइ मान्यिङा यामिन्तोये तुवोमिये वाथुत् थेना वागक् थे लो मोक्स्साप्पा ने हिलापाआ वादःत्खिना दाम्रोमाये वाकइखि थे ऽ खाङा थे नान् मोक्स् तोक्छि वारिसा थे ऽ खङ्कखाप्का होहोरेम्मि सागोवाप्का योयुवाक सुखा सुराप्पा हिलावा वादःता हो छिलु अइवा तो अइवा योयुवा थे ऽ
निनाम्मा रिदुम्मामि सिम् ललइ ललइ तुम्ते मान्यिमो मोक्स् होङ्छाआ वाछा मखि वालक्खि लो सुम्नि दुपु पुयु दुपुङ् हिलायो दोदियोक आचेसा रोङ्केलु याथोङा थे ऽ
पुपो होङ्छा छारुइछा लुम्दुछा सो दाम्रोमा सिसम्मा रुवोःङा थे ऽ खाङा थे नान् तुम्नोछा ने ङायि मान्दि निछि मान्दि योयिङा थे ऽ खाङा थेना देना होनाइ यामोयोङ्चुङ् वापिका थे ऽ खोदोतोलो चिन्चोलिआइ तुम्नोछा ङ छारिछाप रिदोछाप ओ दोपेर्छोपि सिकि पुम्दिल् वाछुयोःना निनाम्मा आम् पा यो रोबुप्तो रुवोङोःना सिकि पुम्दिल् वालेनोः के ऽ खङ्क खाये वालाःप्ना याथोङाव ऽ आम् पायो रोबुआ देनातकइ सेक रिस दुबाइय म खङ्क साम्दि योछा मव योयिङाव लोदुइ थेना सिकि पुम्दिल् दोपेर्छोपि वाछुइ थेना निनाम्माप्तो रुवोङा थे ऽ खङ्कखाप्का साखि पुम्दिल् वालाप् थेना तुम्नोछा सो उम् पायो रोबु पारुपाप्तो निनाम्माप्तो रुवोङा थे ऽ
खाङा थे नान् तुम्नोछाआ ओ पायो रोबुयो ङ ओ रोबि सापाबुप्चि तुप्सि गोपा गिलु गोपा रुवोःङा के ऽ कोङा यो छारुइछा रिदोछाक देनाहोनाइ यामोयोङ्चुङ् वापिका थे ऽ खाङा थे नान् उम् पा यो रोबु पारुपा एक्दाक्पाआ ओ छा यो सिसम् बुप छारुइछा ङ रिदोछा ङ आम् बेलेवापुङ् दोरि मव दोआन्चिव ऽ खङ्कखाप्का चारि साङ्मा यामिना खारु लव बोतो लना खङ्क खापि लोरिस्चाइक छिर्मा गुलो यामित्तोये वाछा मव वालक्चव लोदुइ थे ऽ दोसम्मापि खोलो गुलो यामिय लो छुप्रिम् बुङ्ये लोरिस्कपि वापत्नव ऽ खङ्कछामि सुरिलाप्छा योबाइयना सुरि काम्मा यामिय के लोदुइ थे ऽ
खाङा थेना तुम्नोछा ने बेलेवाला दोरि मन्चि दोआन्चिना उम् पायो रोबु पारुपा एन्दाक्पाआ वारे लक वाछे लक मिकु मतो मुमेर्तो चारि साङ्मा यामिन्चि थे ऽ खोदोतोलो चारिमाप्का चारि थिङ्मा वापःका थे ऽ खङ्क सोङा रुमासा थे ऽ खङ्कमि सो दोसम्मापि तुम्नोछाआ चारि साङ्वा यामिकपि छुप्रिम् लोलिसा थे ऽ खाङा थे नान् छुप्रिम् बुङ्ये दुबाइ थे ऽ खङ्कयो ने तुम्नोछाआ उम् चुकुहुआ वापत् थे लो चारिमापु वाहुप्सा थे ऽ खोदोतोः लो होहोरेम्मि सागोवाप्का योयुवाक वादिकु हिकायो चाउ रुवोःङाना वादइम्खाम् सो योथोःङा थे ऽ
खङ्कमि दोसम्पि सो छुप्रिम् बुङ् दुबाइ थेना सिसम्तिम् सम् सेः थे ऽ सिसम्तिम्मि सुरि लाप्छा योबानाना तुम्नोछा लो सुरि हुम्मा यामिन्चिना हेलेन्दाये मोरि मुन्चि मोमुन्चि थे ऽ खोदोतोलोन् सिसम्तिम्आ उम् गुलो मःप् तुम्नोछा लो सुरि काम्मा काम्मा म लो छेर्बाआये वाथास्खि हो सिसम्तिम् ने दोवोचाउ केत्वार् चाउचा सानिवाछो यामिचिना याथाःम्खिचि ऽ
खङ्कखाप्का तुम्नोआ ने सिसम्तिम् हाकखापिइ योयिङ्चाइ म यामिनाना तुप्सिमाये वाजेत् लो छाम्छोपउये वाजेत्ताना छाम्छोपउमि मिरि केर् सेले केर् याथोःन्चिना मिरि केर्पि लोरेपाना मिकु म लो सिसम्तिम् ने दोवोचाउ लो केत्वार् चाउआ वाउर्चिना बुवापा वाकाप्स्चिक मिकुपिये योबाना थे ऽ खङ्कखाप्का तुम्नोछाआ देना मुयो यामिनाना तुप्सि जेत् लो गिलु जेत् लो साप्तोलोम्मि हिम्मा बुङ् लो सुक्सुलिबोउ रोलिबोउये वाजेत्ता थे ऽ
खङ्कखाप्का सुक्सुलिबोउमि कुया किल्मा यामना साप्तोलोम्मि हिङ्मा बुङ्आ कुया किल्म्पि वाफुम्ना वाआःप्दित् लो सिसम्तिम् ने निनाम् काम्स्को केत्वार् चाउआ वापेर्खि थे ऽ दोवोचाउक निनाम् आप्स्को वापेर्खाता ऽ मोमोमे सो बुप्तिमे सो साहुम्ति हुम्तिमो सो खोदोतोनाइ याथोङि थे ऽ
चुबि चाउक वेःलिम्मामि उम् सागोछा ने मान्पेइछा ने हेम्बारिला वान्दिलिपु वाहुस्साना रुवोःङ्खाता ऽ खङ्कखाप्का सुन्तोलोउये लोलिन्चिना छेस्कुपि योयिङाक छानिछा सागो मान्छेइछाये वालोक्च लो सोरि मःम् सोसिम्खाम्ये योथोङा थे ऽ खोदोतोना छेस्कु फोलोमा चाउ सो वादःता थे ऽ
सेवा के ।
खोलोआ इ रिदुम् होदुम् सम्सुराम् के ।