- रिदुम् खिम् - September 22, 2025
- स्तुति भजनः पारु र निनाम् रिदुम् - September 4, 2025
- कुलुछाआ मःम् कोयो - August 8, 2025
केछेयिकाङ् फःप्पाचिम् थाम्पु छाःचि हाःम्दोम्पा थे । मोरोनाङ् महाकुलुङ्पि बोक्सेम् लो बोक्सुवार् हास्चि थे । हास्चि लो वालाखाम् लाइस्पि सोः मिःचि थे । खोरोलोये वालाखाम्आ सातु उप्स्दित्कसा उम् ङः हुःखि थे । खन्सा नेइ मान्दुर् हो उम् छोक्छोमाआ नावादे मेक्सा खोःम थे । खेना तेल्पोस्, सुम्निखाम्रे खोलोःआ वालाखाम्आ बोक्सुवार् सोःक् के, लोः ल थे । खुन्तोःलो बोक्सुवार् फुक्स्आ ङाङ् नेप्खिक तुवा थे, उःसोङ् मान्सेदोङा थे । खन्सा आसा सो मान्नत्दोङ्चि थे ।
बोक्सुवार् महाकुलुङ्पि छेम्सिम् नावादेपा तात्ते । केछेः नाम् ला मान्चोःमो बोक्सुवार्पि खः वालाखाम्मि साखाउपिका छेन्दिपत् लो बिर्मुक् जोङ्ल्या छुवा थे । छेन्दिपत् लो बिर्मुक् हायाम् छेइप् लेःप् मोबोछा पकाक तुवा थे । खःचा छुत्तिक मः दुर्चि थे । खन्सा खचि निङ् खोलोःपि रिङाक तुवा थे ।
निङ् हायाम् रिङा कप्का इक्छेम् सङ्खुवासभापिक चेवापिका मोःप् थम्स् दालास्चि थे । थम्स् युवा लोने ङा, पुः, बोरो, गोस्केला, मुउचिम् सा लो जागुलो मिःचि थे । खः रिङ् मोबोछाचा तुम् तःदित्चि थे । खेना फेकुयोप्मि खोङ्पिक खः सा सो मोबोछाचिम् खोङ्पि तेः मिःचिना खाइवाक कान्दि मिःचि थे । मोबोछाआ दप्ना ङा, पुः, बोरो, गोस्केला, मुउचि लाइस्पिक तोङ् मुसि मदित्चि थे । खेना मोःप् खिम्पि हारो हारो हाप्स्चि थे । नाःक मोःप् खोःप् खोलोःङ् दाङुम् लः मिःचिना खचि छिर्माजि फेकुयोम् खुर्मिचिना खाइलेत्चि थे । साल्पा विःचि कप्का इम्स्चाक खोलोःङ् थिइ मिःचि थे ।
इक्छेम् सो लिम्बुआ उम् छा दुवाङ् तुक्चाये । रोम्पिम् छुवाये पिकाना छेन्दिपत् लो बिर्मुक् दालास्चि थे । खुङ्कपि सो जा, खाइपि चिः युक्स्चि थे । खुङ्क सो छेन्दिपत्आ तुम् तःना बिर्मुक् इः थे । खेना बिर्मुक्आ चिः मुत्तिङ् थे ।
चिः तेःप्आ युपा मस्बु मःय मिनाथेना मोबोछाचा चिः युःप्मि लाःउ लाःप्चि थे । खेना वाबम्पि छिःचिना वोसोआ दिःदित्चि थे । देत्छा मोःप् याता कप्का सेउलाम् गोपु युक्स्चिक वाबम् मोरोङाइ मात्युक्स्चि थे । मोबोछाचि धनकुटा दिकुरेम् गो दमाइ चौतार तायुवा लोये मिन्खिचि थे । खेना बिर्मुक्आ नित्चि वसो मुत्ना वाबम् लाःस् पोक्स् थे ।
छेन्दिपत् लो बिर्मुक् पिलुवा ताबाना थे । पिलुवाप्क मिचा छेन्दिपत् लो बिर्मुक् खचि तेल्ला खात्चाक तुम् तःचि थे । खेना अरुण लो पिलुवा येउमि तुप्स्को हेम् राकास् देक्मा देप्सिवा लुङ् गोःपु तुवाक रिङ् इःचि थे । देक्माआ उम् दोः हेम् अन्वादे नावादे लाम्दुप् खोलोःक उम् सोम्आङ् थुत्च थे । राकास् देक्मा आसा सो उःसो मः मान्दुर्चि थे । खन्सा छेन्दिपत् लो बिर्मुक्आस्चि सेइ दुःरस्यो पिकाना रिङ् युक्स्चि थे ।
पिलुवा पोःस्चिम् रिङ् येन्चिना छेन्दिपत् लो बिर्मुक्आ राकास् देक्मा बाथेर् हुम्छचि थे । बाथेर्आ फोक्चे गक्सेत्चिक देक्माम् हिः अरुणपि रेक् लेइ युःपा, लेपा खात्चा थे ।
खः रिङ् यालाखम्पा हाङ्मि नोबोपि सो तातेक्साक तुवा थे । खुन्तोलोङाये हाङ्मे हायाम् लोक्तो तुकाचाक तुवा थे । हाङ्आ छुत्तिकसा रोक्स्दित् सोमा हाङ्मे मान्न थे । हसोङ् तुक्तोङ् खात्चा थे । उम् सोःम् ङाङ् छुवाखात् थे ।
हाङ्मे सिम् हः कप्का हाङ्आ छेन्दिपत् काछोक्स् पोक्स्चि थे । हायाम् तोःम्पा दोसो हाङ्आ पिका कप्का छेन्दिपत् हाङ्मे खोस् बाना थे । खोरोलोये छेन्दिपत् ने हाङ्खिम्मि होप्छोपाङ् युक्स्चिना आछ्याङ् यो पिकाना उम् सेस्मो चेत्चि थे ।
छेन्दिपत् साखिआ छुइचि थे, खेना खः साखिम् छोः हाङ्खिम् गोःपा वन्चि थे । साखि छोःआ बाराम् खुइ मित्तो “अङ्क हाङ्मे यो” पिक्तो तत्चि थे । छेन्दिपत्आ “मा, अङ्कन् बाराम् ये” लःचि थे । खोरोःनाङ् साखि छोःआ दाप्सि खुइ मिःत्तो “अङ्क हाङ्मे यो” पिक्तो तत्चि थे । छेन्दिपत्आ “मा, अङ्कन् दाप्सि ये” लःचि थे । खेना दोःस्पि साखि छोःआ हाङ्मे पइ मिःचि थे सोःङ् हाङ्मे नखाता थे ।
हाङ्मे नखाता लो हाङ्खिम्पि खोलोःमि जिः नखाता थे । हाङ्आ खाप्दित्क उम् तोःमा छेन्दिपत्आ नःन्ला मिः थे । खन्सा हाङ्मि जिः नहो — “छेन्दिपत् आना उःइ खाइय, ङोक्ते” लः थे । छेन्दिपत्आ “हाङ्मे नखाता लो ओमि सो हायाम् ओ जिः नखाता । हाङ्मे ओमि सो मा तङ्कङ् के । खन्सा कोःङ् उः सो पिम् बोक्स्नो के” हाङ् लः थे ।
खोरोलोये हाङ्आ “आन् मन्तो तोःम् ला बानाक । आत् लो उःना उःक खाइम्ङा छुवे” लः थे । छेन्दिपत्आ उःचि मान्खाइमो लेतोःनो पिःम् छेत्कप्का “खोरो पियोःकङ् दोः हाङ्खिम्मि लाइस्पाक देप्पा साप्फेलु पियो ते” लः थे ।
छेन्दिपत्आ साम्फेलुङ् ङोक् थे लो हाङ् दुवाङ् उम् गेःम् लः थे । “खेना अन्तोरो देप् साम्फेलु उःइ मःम् ये, दानाइ खाइय ? अन्तङ्क लुङ् खाइम्पिका नःप् उःचि ङोक्ते” हाङ्आ छेन्दिपत् लः थे । खोरोलोये छेन्दिपत्आ खः साम्फेलु दोङ् खाइप् छुवे । माःरोदो उःसो मान्दिङ् आत्तोः लः थे ।
छेन्दिपत्आ खोरो पिकाकप्का हाङ्आ सो “साम्फेलु खाइनते पिकोःकन् माःसे । मङ्क उःपि सो गोः मान्न मिनोःनाये । खायोःङ् मिन्दो नाक साम्फेलुङ्ङा खाइते से” छेन्दिपत् लः थे ।
छेन्दिपत् खोलोःक छेइप् तुवानाङ् छेन्दिपत् लःचि थेक । साम्फेलुपि लुखुप्छिलोक जिः तुवा थे । खुङ्क हाङ्आ मान्छेत् थे लोये छेन्दिपत्मि बोउतोआ लाइस्पिङ् तुम् तःदित्क तुवा थे । खन्सा साम्फेलु ङोःक् थेक । साम्फेलु पप्दोपा जिःम् निङ् छिर्मारिम् तुवा थे । छिर्मारिम्आ हाङ्खिम्पि खोलोःक नखावा फोक्स्क तुवा थे । खुङ्क रिङ् हाङ्खिम्पिकचा आसासो मान्छेत्चि थे ।
हाङ्आ साम्फेलुङ् छेन्दिपत् पिप् छुवा थे । खिक्का छेन्दिपत्आ साम्फेलुङ् मुत्ना चिःमाछा मः थे । खेना उम् जेम्पि तेःस्ना हाङ्खिम्ला लत्ता थे । खुन्तोलोने हाङ्खिम्पिक खोलोःआ छेन्दिपत् कल्खिचि थे । खेना हाङ्आ सो मान्कल्मो मान्छुक् छुवा थे । खन्सा हाङ्आ छेन्दिपत् साम्फेलु आइ मिः थे । खिक्का छेन्दिपत्आ खः साम्फेलु लाइस्पिक तोः देप् मना होक्सि थे । खोरोदोसो लुखुप्छिलोक जिःक छेन्दिपत्आ लात्खिना उम् जा योङ्पा युक्स् थे । मङ्कप्का छेन्दिपत्मि खिम्पि होङ् पःका थे ।
छुक्तो खाता लो इक् लेइ जा योङ्पाका छिर्मारिम् चोन्चिना लत्ता थे । छिर्मारिम् चोन्चि लो ङालिलःप्छा सोलोमे तोङ्ङा ङेसा थे ।
अयमोक्स्तोक सोलोमे छिर्मारिम् छेन्दिपत्मि तोःमाआ तःखि थे । खेना छेन्दिपत्आ हादेलोइ रेन्मा खुरोछो मिना थेना छिर्मारिम् थुवा दः थे । खन्सा छिर्मारिम्मि छुलि काताहो जा योङ्ला लत्ताना खालेता थे । खुङ्क छेन्दिपत्आ तुम् तःना देइङा खिम् आत् थे सोमा छिर्मारिम् मान्आत्ता थे । खन्सा छेन्दिपत्आ बोक्सुवार्मि दाम्रो रत्ना खन्गोपा छिर्मारिम् छिः युक्स् थे ।
इक् लेइ छेम्सिपाक इल्पो थिम्रा बोक्सुवार्पि लिङ्गुलु खोःतो छाम् लचा थे । थिम्रा छाम् लक येन्ना छिर्मारिम्आ सो दुइ थे । खिक्का छिर्मारिम् लो थिम्रा छाम्पिका दुइ ल थे । खोरोलोये छेन्दिपत्आ दाम्रो गोःपा छिः युक्स्क रिङ् छाम्पिकाङ् छिर्मारिम्आ थिम्रा इः थे । खुङ्क येन्ना थिम्राआ छिर्मारिम् दाम्रोपाका लात् थे । खेना दो छेम्सि खात्चि लःना लेम् थे । खोरोलोये छिर्मारिम् छेम्सि सो मान्आत्ता थे । छेम्सि ये दुप्आ खाइनु पिकायुक्स् थे ।
छिर्मारिम्आ बोक्सुवार्पिका खेम्पालुङ् तोदि लाम् रत् थे । खेम्पालुङ् सिलिचोङ् २, ताम्कुम् छोक्पि तात्ते । खेना थिम्रा सोङ् छिर्मारिम् लो खेम्पालुङ् खाताना तुवा थे । इनिम्बा खेम्पालुङ्मि बर्बार् तुप् थिम्राचि छिर्मारिम् लो खाताना छासाक थिम्रास् थे लःयचि ।
माइयुम्पा रिङ् छेइम्पा के । ओलोनुव ।