- रिदुम् खिम् - September 22, 2025
- स्तुति भजनः पारु र निनाम् रिदुम् - September 4, 2025
- कुलुछाआ मःम् कोयो - August 8, 2025
अङ्क चार्पि सोःम्छा छुवेःना उःछा–उःछाचि मःयाम्कङ् छुवे । हेप्आक खारुवा मःयाम्ना हिङेःचि । हेप्आक तेल्नाम् चार्पोस्चिम् गुलो मःयाम् । सिपो इन्द्र कुलुङ रोबुआ सो छुक्सिप् कुलछाचि खेना तेल्नाम् चार्पोस्चिम् चोलो गुलो मक तुवे ।
इन्द्र कुलुङ उम् पाः रोबु डिल्लीमान् कुलुङ लो उम् माः चुनु पञ्चमाया बान्तावामेआ बिक्रम् संबत २०१५।०८।३० क लेइ होनित्ति साखाम् / साखाउपि वाःत्क तुवा । रोबु इन्द्र कुलुङ खन्तोलो क कन्याम गाउँ विकास समिति ७, इनिम्बा क सूर्योदय नगरपालिका ७, इलाम्पि छुवा ।
इन्द्र कुलुङमि पाः डिल्लीमानमि बुसुम्चि लिप्पो तुवाकपि रोबु क छातेल्बुप् तुवा । डिल्लीमानमि तोःमाचि सुप्पो तुवाकपि पञ्चमाया बुसुम्छाम्ला बुसुम्छाप् इन्द्र कुलुङ् खेना सुप्पो मिःम्छा नेछोचि छुवा । लुम्दु तोमालाक इल्पो वात्छा तुवे । रिदो तोमालाक लिप्पो छुवाकपि बुसुम्छा धन कुमार कुलुङ खेना उम् नेछो सुप्पो मिम्छाचि तुवे ।
रोबुआ बिक्रम् संबत २०५० लोनाप्पापि भोजपुरपाक रिता बान्तावामे लो सुःर् खम्चिक तुवा । खोरोलोइ बान्तावामे लो खचि सुःर्आ मान्थात्चि । खन्सा निस्दोङ् तुवा लोङा चिःमाछा रिङ्छाप्का खचि छुलि काइन्दि लः । खेना नाप्तोछो मना रिता बान्तावा उम् नाःपि खाता क खिक्का मान्आत्ता । इन्द्र रोबुआ सो उम् तोःमा मान्लाःमु, काछोक्स् सो मान्खाःता । खोरोःना पाःपा, माःमा मान्छुःङा खचि लाम् दोक्सा ।
कन्याम्पिङा इन्द्र कुलुङमि सागोवा बाःता । उम् हारिवा बाःना कप्का उम् मःम्मि बोःगो बुवाम् गोःपिका सेस्मोखिम् खाःता । कुलु १५ दोङ् तोःदि उम् मःम् लो तुवा थे । खोलोङ् खारुछि हो खचि खिम्पि चाःम् दुःम् मान्रेःता थे ।
रोबु लाइस्पि श्री पद्यमा प्राथमिक विद्यालय, अम्बि, कन्याम्पि सुक्कोङ् तोःदि सेचिवा इःन्चि । खिक्का श्री कृष्ण आश्रम नि.मा.वि., कन्याम्पि लिक्कोङ्पिका बोक्कोङ् तोःदि सेस्मो इःन्चि । खिक्का रेक्कोङ्ला एस.एल.सि. तोःदि श्री कारपोक मा.वि.पि., आइतबारेपि सेचिवा इःन्चि । इन्द्र रोबुआ यालाखम्पिका स्नातकोत्तर तोःदि सेस्मो याःतु ।
इन्द्र कुलुङआ सेस्मो इःन्चिना खोलोकपि सेचितोउ मः । खसा मःक उम् तोउखम्चि– एक्सन एड नेपाल (२०४७–२०६१), भौतिक पूर्वाधार अधिकृत (२०४७–२०५४), वरिष्ठ कार्यक्रम अधिकृत (२०५५–२०५८), कार्यमूलक जनपैरवी अनुसन्धान परामर्श दाता (२०५८–२०६१), कार्यकारी निर्देशक, आदिवासि जनजाति गैह्रसरकारी संस्था महासंघ (२०६३–२०६८), महासचिव, नेपाल किरात कुलुङ भाषा संस्कृति उत्थान संघ, अध्यक्ष, हिमालय नेचुरल फाइबर फाउण्डेशन, अध्यक्ष, होप हर्मिटेज नेपाल ।
रोबु इन्द्र कुलुङआ उम् होपाङ् दुप्स्ना चाम्चेस् क सक्सोहर्चि ओरोःतो तुवे । खः सक्सोहर्चि– किरात कुलुङ जाति, २०७५, बोटे समुदायको जीविकोपार्जन रणनीति, २०११, नेपालका आदिवासिहरुको मावन अधिकार, २००६, नेपालको पूर्वी क्षेत्रमा एच.आई.भि. एड्सको अवस्था अध्ययन, २००१, नेपालको पहाडी ग्रामिण खानेपानी व्यवस्थापन प्रणाली, १९९६ तुवा ।
केइ कुलुछाआ रोबु इन्द्र कुलुङमि निङ् हादेलोसो माताःम्नो । उरोहोइ पिक्या लो रोबु इन्द्र कुलुङ कुलुछाम् इल्पो लाम्लछा तुवा । रोबुआ कुलुम् तोनाम्पि मान्मक उःसोङ् मान्तु ।
इन्द्र कुलुङआ कुलुम् छेइमाको थोरेम् छुवे पिकाना मुलिचार्पिका मुक्सु खोलोः कुलु गोःपि, कुलु तेल्पि, थारु बाजुचिपि साल्म् पिःदोङु । रोबुआ फसिखातिःक केइ कुलुछा इक्देउपि काप्सि । बात्ल मइना इक्काम् मइलातिः । इक्देउपि छुप्सि । मुलिचार्पि इः रिङ् युङिपियि । इः रिदुम् होदुम् सम्सुराःम् पिकाना खोलोक वाहाप्पा लयि ।
उम् होःप् मान्नेःना दोसो खोलोःआ कुलु रिङ् सम्सुराम् के पिकादोङा । कुलुम् सक्सोहर्चि छापाःम् के पिकादोङा । खेना उम् होपा सो कुलुम् तोनाम्पि खोलोक सक्सोहर् छाप्युक्सु । सेचिखिम्पि कुलु रिङ् तोःम् छुवे पिकाना खोलोक निछिमा मियि । खुङ्कसाङ् इनिम्बा कुलु रिङ्ला कुलुछाचि सेचिवा इःम्चिम् तःचयचि ।
कुलुम् जिः नखावापि सो इन्द्र कुलुङपिङ् दोरिचि । हाःरो–हाःरो इः छुःम्वा देइम्वाप् सो खःपिङ् थेरिचि । उःचि सोबोमारु सेचितोउ रुथोक्सा लो सो रोबुम् छेलाम्ङा खोङुम् । नःप् मान्नःप् खोलोःपिङ् रोबुङ् लाम् लयुम् । खोरोःना खोलोःपि दालासुम् लो, खेना केइ दालासि लो हादेलो सो उम् गाम् मान्लिसा । उम् गाम् हाम्–हाम् लो, उम् गोङ् चानतो रोबुआ हुपिचाइक तुवा ।
कुलु गुस्खम्मि देप् तोउतोःप् छुवाना केइ कुलुस् कुपिचाइक तुवा । तेल्–तेल्पि खाःताना कुलुछास् निःउ हिःचि । ललइ इत्तो बात्ल मतो इक्काम् मतो बायि । यालाखम्पि थाम्पु खेइम् चाइ बाइयु । खोलोःचि रोङ् रेः मिःचि । कुलु रोदुचिम् तुस्को खाःताना रोङ् बाःत्ल मः । गुस्खम्मि निङ्पि थाम्पु खेःतु । खुङ्कपि इनिम्बा कुलु गुस्खम् तोःतुया ।
कुलु गुस्खिम् तोतुयाकप्का यालाखम् तुप् कुलु रोदुछाचिम् हायाम् देप् सोःम् थोङा क लःलिम्पा ।
खोरोनाङ् खोलोःआ तेल्तेल्पि कुलु गुस्खिम् मतो बाइचयचि । इन्द्र कुलुङ रोबुआ मथक तोउ सुनेइआ छेलाम् हत्तु । इनिम्बा कुलु गुस्खिम् संखुवासभा, भोजपुर, सोलुखुम्बु खालोःपि तोतुया क तुवे ।
पाठ्यक्रम विकास केन्द्र, सानोठिमी भक्तपुरलाम् कुलुम् सेस्मो इःम्चिम् सक्सोहर् लत्चाइ क तुवे । अन्तो छुःम् तोनाम्पि इन्द्र रोबुआ हायाम् उम् लोङ् येत्तु, उम् हुःवा चेप्स्क तुवे । रोबुआ पाठ्यक्रम विकास केन्द्रपा क तोउपोचि लेम् नःप् लेम्चि, राङाःम् ना छुप् राङ्चि । उःइ मःयाम् लोइ छुक्पा मङ्क खोलोक मना इनिम्बा कुलु रिङ्मि सो सेस्मोखिम्पि सक्सोहर् तोक्स्चाये ।
होःप्मि बोउतोरोआ चोखोमा हिःन्चितो खोलोःमि इः तोनाम्पि हायाम् छुःम्वा देइम्वा मतो बाइयु । आस् सो उम् छुःम्वा देइम्वा खुर् मान्मिःयु । साका वाम्वा तेम्तो नाम्छोवा, दुप् छिदुम् मान्पोःमो कुलु रोदुछास् तुस्को तेल् खाःताना हायाम् देप् तोउ मथक लःलियाःम् ।
इन्द्र कुलुङआ नःप् तोउ मतो बाइ सोमा उम् तोबुवाआ मान्काइकसा मथक तोउमि बिरिम् मान्बेइमो बिक्रम् संबत २०७९।०५।२४ क लेइ अः चार् होक्सि । खोलोःपि हुपितिः क, कुपिदितिः क इः छेलाम्फोक् रोबुआ उम् हिदुपिङ् होक्सियि लो केइ खोलो इः पाः–माः मान्दिवा गेस्कुप् तोङ् लइचायेः ।
इन्द्र कुलुङआ होक्सिःयि दोःसो खसा मयुक्स्क सेचिवाचा रोबु दाःलोसो माताःम्नो । रोबुआ थोक्स्क गुस्खिम्पि, लइक वारे वाछेपि, छाप्क सक्सोहर्पि, कुलु सेस्मो इःन्चिस्को सेस्मोखिम्पि, खोःमियिक छेलाम् देलाम्पि केइआ तःम्चायाःम् ।
इन्द्र कुलुङमि दुङ्खा सिलिचोङ् ३, दुधेटारपिक उत्तर कुमार कुलुङ्आ बोःम्पा ना छाम्पाक के ।