- रिदुम् खिम् - September 22, 2025
- स्तुति भजनः पारु र निनाम् रिदुम् - September 4, 2025
- कुलुछाआ मःम् कोयो - August 8, 2025
सोमोरि रिप्खात्ना मान्साप् छुवे
सोमोरिआ मिस् रेपेःना उछाइ पियिचायेः, इ नखावा सो बान्चा मिःय । खोरोलोये सोमोरि नमाइ नइचायेः पिःम् रिङ् रेपाम्नो, सानिवा तेसाम्नो । पियेःक उचि मान्चान्खा, मान्दुन्खा ङाङ् मम्चायाम् दो इ सोमोरि इस्लाते, रिप्लाते ।
खिक्का सोमोरि लाम्लखात्ना आसा, आये मिनेःक सो सोमो बान्खाते । ङालि नप्ये मिनेःक सोङ् सोमोङ् छुखाते । इ ङआ पिकेःक, नेनेःक सोङ् सोमोङ् छुखाते । मुक्स्आ खोङाम्क सोङ् सोमोङ् छुखाते । पताम्क सोङ् सोमोङ् छुखाते । बुरेक ने निङ् तङ्क आचेसा सोमो छुवे । खन्सा खन्तङ्क मिस् मान्साप् दइत् छुवे ।
खोरोना मान्साप् मिचा दइत् छुना खोलोक सोमो बाइयक उम् होपा सो छेत्तनो । छेइछेइसा मान्नप् छुःनुते मिन्ना मिस्, हिङ्वाचि सोमो तियस्क छुनो । उम् होपा मान्छेइसा इसाखात्क, रिपाखात्क उम् सोमोरि लाम्दखात्ना दःत् लो खोलोक खिम्छिनि खिम्दुनि खिम्तोबेइचिपि सोमोदखा होङ्छयचि ।
खोरोना मिस्चिपि, हिङ्वाचिपि सोमो बान्कप्का बोप् चिर् मयाम् लो खतिछाबउ छुना तेल्नाम्पि मान्साप् मिस्मि ङायिवा जिप्से । खोरोलोये मान्साप् मिचा खोरोना सोमो बाइचयक उम् होपा छेत्तनो । हेप् मिचा सो उम् सोमोरि हिक्साना, उम् चम्मे रिप्पाना मोरोना उम् होपा मान्छेइमो सोमो बाइचयक पिःम् मान्छेतुम् । खन्सा मान्साप्मि ङायिवा जिम्साम् हो इसाखात्क उम् सोमोरिचि रिपुम्पुयाम्क तुवे ।
खन्सा हना तेल्पि मान्साप् मिस् खतिछाबउ छु दो दइत् छुवा पिकेःना उम् ङायिवा जिम् छुनो । छेइप् लेःप् मोबोछा तेःम्ना रिपाखात्क बपाखात्क उम् सोमोरि सल्म्पिम् छुवे । खोरोना उम् सोमोरि सलुम्पुयाम् दो मान्साप् मिस् नलाते । खिक्का तेल्नाम्पि सोमोदखा बाइयनो । खोलोमि नखावा बाने । मान्साप्आ खाङेःक नखावादाम् चायाम्ना नइनो । मान्साप् सोमोम् या सेइ लेःप् खुलु / मोबोछाआ मान्साप्मि या सेतना ङाङ् नःये । खन्सा मान्साप् खतिछाबउ छु दो सोमोम् उम् या सेइम्दिम् छुवे ।
मान्साप् सोःम् सोसेल्चि
दना, छुबुइ, काउ, सेर्, बिछु, वालाम्मा, रुम्, बिरुप्सि, चाम् सि, दि छुःम् बोक्से ।
सोसेल्चि चुम्
इबुम् दना थोम् छुवे । छुबुइ काउपि चोम्ना इक् कोलु दनापि युःम् छुवे । छुबुइमि कोलुपि इबुम् वालाम्मा थुःम् छुवे । मङ्क दनापि रुम्, बिरुप्सि, चाम् सि, दि युःम् छुवे । खिक्का इबुम् चुम्पिका काउ चुम् छुवे ।
सोसोरि सम्दुखामो लइम् रिसिवा
लाइस्पि सेर्, बिछु छेःम्ना खिम्पिक सोमोरि सम्दुखामो लइम्दिम् छुवे –
अ खुवो गोप्क होङ्पाच होङ्ममाच सोमोदखा योबाइप्चाप्चि मुक्स् रि नाप्प् रि मिक्चि ऽ नउरि बाउरि मःप्चि ऽ चारि लेइप् खादि लेइप् निनाम् लेइप् सानि नाइप्चि खाम् वोःङ्चाइ सो आम् चुकुहु देमाहुलाम् ङाइ वाहेप्साम्ना – खङ्कम् – रियाम्दुपि सोमोदखा योयिङ् सो सुवो सेल्तो लोछा लात्तो बुसुम्खापा तोबुवाछे रिरिवाछे यामियाम् के ऽ
मान्साप् सोःम् रिसिवा
दना तुक्खाम् दोक्पि युःम् छुवे । खिक्का रिसिवा मतो सेर्आ तुक्खा हाइम्ना दनापि तेःम् छुवे –
नेव आन् नउरि मपा बाउरि मपा ऽ मुक्स् रि तेपा नाप् रि तेपा ऽ चाम् खोपा दुम् खोपा ऽ हिङ्वापि मुक्स् तेपा ऽ खारुतोउ यिक्तोउपि मुक्स् तेपा ऽ मिस्मि रियाम्दुपि सो मुक्स् तेपा, काङ् तोपा ऽ चारि लेइप् खादि लेइप् निनाम् लेइप् ऽ आम् जेइ खो मःप् – खङ्कचिम् – रियाम्दुप्का अ खुवो गोप्का हेम्चिना आम् तुस्को बाइस्को खात्ना तुवाव ऽ आम् साम्दि दाक के, नेव खात्व ऽ हसोङ् ओरोनाङ् सोमोदखा बाइचय दो ऽ आम् जेइ खो मचय दो ऽ बोप् चिर् मुयोना खाचिलु बायाम्ना ऽ रुबुसि जेजेवा मुयो के ऽ मुलु दोम् मुयोना आम् ङायिवा जिप्स् के ऽ आम् साम्दि दइ लो खात्व ऽ
हना दना कम्ना छेलाम्खा देलाम्खापा छोम्युम् छुवे । अन्तोतोना मान्साप् सोःम् याते ।
कुलु रिदुम्, बोउ ६७९ – ६८०