- रिदुम् खिम् - September 22, 2025
- स्तुति भजनः पारु र निनाम् रिदुम् - September 4, 2025
- कुलुछाआ मःम् कोयो - August 8, 2025
खप्दुलु रावा योउलाम्पा पिल्मो खाताना तुवा थे । खप्दुलुम् तोःमा फालि साम्पाङ्पिक साम्पाङ्मे तुवा थे । खङ्कम् सागोवाप्का सुप्पो वात्छा छुवा थे । बुसुम्छाप् ताप्तिमुर्, लुम्दुछाप् नारिजन् खेना रिदोपा छाम्पानाम् तुवा थे । उम् छाःस् सायिछा तुवालोङ् खप्दुलु सियाखात् थे । खन्सा उम् तोमाआ सुप्पोङ् खचि छाःस् छेल् खिम् खाइचि थे ।
साम्पाङ्मे सो उम् हारि तुवालोङ् अः चार् होक्सि थे । खन्सा सुप्पो गेस्कुप्चि खचि मःम्आ खोःम् बोक्सा थे । कोक्पाचिम् खिम्पि हारि बान्चाक खप्दुलुछाचि देप् छुवाकप्का कोक्पास्काङ् दिबुवापि खाता थे । खुङ्कये खप्दुलुछाचा खचि कोक्पाचिप्का बेइ लिफु दुङ् तोः लेःस्चि थे । दिबुवा सो यःस्चाङ् दुङ् सेत्चि थे । खुङ्कसा खचि कोक्पाचा यःस्चि चिस् नाचुर् खोङ्चि थे ।
यःस्चि कोक्पाचिप्का खोलोःकपि कोक्सा थे । खुङ्क तेम् मान्दुर्चि लो कोक्पाचा खचि यःस्चि अरुण योउपु लेइम्तिम् चाइ मःस् थे । खः रिङ् खप्दुलुछाचिम् मःम्आ तुम् तः थे । खोरो दोःसो साम्पाङ्चिम् रुबुसि मःमाआ राप् मान्दुर् थे । खन्सा उल्पो दोसो उम् चास् लेन्चानु मिनाना छाम्पानाम् सेपा सेपा आस् सो मान्पोःमो वाबम्पिका काउपि पोक्स्तिङ् थे । वाबम्मि छुइपि गोदि मःम्पा तुवा थे । खः वाबम् मान्पेम्मो खिम् आन्नव उम् ममा छाम्पानाम् लःतिङ्क तुवा थे ।
छाम्पानाम् काउ बाइस् खाता थे । खोरोलोये काउ बाइना आत्ता लो लाम्पिङ् वाबम्पिक काउ पात्खाता थे । खिक्कासोङ् आत्ताना काउ बाइ थे । खोरोःनाङ् खिम् आत्ता लो काउने पात्खाता थे । ओरोना मचलोङ् नाम् कुराखात् थे । नाम् कुराकप्का छाम्पानाम् मोरोेङ् खिम् आत्ता थे । खुन्तोलोये आथुइ लेपाङा छाम्पानाम्मि बुःस् ताप्तिमुर् लो नारिजन् खचि कोक्पाचा अरुण योउहेम् खाइचि थे । खेना हेयोङ्मापिका नावादे खान्चेचेना योउपु तःल्छोक्स्चि थे । छाम्पानाम् ने काउ बाइस् खालेता हो लेःता थे । उम् बुःस् क कोक्पाचा योउपु तल्सेत्चि थे ।
उम् मःम्आ छाम्पानाम् दाना दाना कोक्पाचिप्का सुल्तो हारि तिः थे । हारि बानाकप्का छाम्पानाम् उम् ममा उम् पाःम् तेल् पिल्मो पोक्स् थे । उम् पाम् थाम्पु तन्तो छाम्पानाम् महाकुलुङ्मि गुङ्तेल् तालाता थे । खिक्का इबुम् लुबम्पि हायाम् दोङ् तुवा थे । खुङ्क लुबम् इनिम्बा सो छाम्पानाम् लुबम् निङ्आ छेताःम् ।
छाम्पानाम्आ खुङ्क लुबम् होक्सिना खःप्मि यिः खाताना तुवालात् थे । खःप्मि यिःपु तुवा लो खःप्मि छा खप्दुछेइम् लो तुपा थे । खेना नइलना सुःर् खप्स्चि थे । खप्दुछेइम्मि छेल्चा छाम्पानाम् मान्नत्चिकसा मोक्स् मान्मःस् थे । खिक्का खःप्पुका जुकाना पिल्मोचिम् सोःगो खाता थे । सोःगोसिस् चःस् थे । खप्दुछेइम्आ जोङ्ल्या चार्छाःस् वात्चि थे ।
तेमे मासाक हायाम् बाइ लोसो खो मान्मन्चि थे । खन्सा खप्दुछेइम्मि छेल्चा तेमे सिया यो तुवे यो पिकाना खोलोःपि लाम्चि थे । खुन्तोलोये खप्दुछेइम् ने पिपिल्योःक उम् छास्का तुवाचाक छिप्चि थे । खिक्का खप्दुछेइम्मि छेल्चा इः तेमेन् पिपिल्योःक उम् छास्का छिम्पा के लःचि थे । खुङ्क पिपिल्यो लःचिक रिङ् फाल्तो खाता लो पिल्मो छुवा थे । पिपिल्योक यःस्चि तुस्को थाम्पु दोस्का पिल्मो छुवा थे । खेना इनिम्बा पिल्मो, पिल्मोङ् सो पिकेः । पिल्मो थाम्पुम् निङ्लाम्पाङ् खप्दुलुम् छाःचि पिल्मो पिकेः ।
खप्दुछेइम्मि सागोवाप्का ङाक्पो चार्छाःस् छुवा थे । बुसुम्छाप् होनित्ति, लुम्दुछाप् लोवात्ति, छातेल्बुप् सुर्वा, खातेल्बुप् मोरोमुल्, रिदोपा गोक्तुलु छुवा थे । खप्दुछेइम् उम् हारि तुवालोङ् सियाखात् थे । खन्सा छाम्पानाम्आ राखापुका सुःर् खप्स्ना थः थे । खुङ्कला थोःप् छुवा थे ।
छाम्पानाम्मि लाइस्पिक तोमालाक छाचा पतो खाता लो मिस्मि सिलुम् मः लेःस्चि थे । खेना दोःस्पिक तोमालाक छाक तोःस् बिः लेःप् नोक्छो छुवा थे । दोस्का थोःप्मि छाःचि पिल्मोपाका सात्दि लो देनाम् तेल्पु खाताना तुवा थे । सात्दिपि मिस् सियाखात् लो पिल्मोलाम्पा सतिपुस् युत्चि थे । खिक्का पिल्मोपि तोःस् मःम् बोक्सा लो सात्दिलाम्पा नोक्छो दालास्चि थे । खन्तोङ्नाङ् मङ्कपिक रिदुम् मथचिक तुवा थे ।
छुक्तो खाता लो दिबुवा लाम्तो, खारुवा मतो रेम्चिम् बोक्सालात् थे । थोप्मि छाःचि सात्दिलाम्पा दिबुसा तुस्को, खारुवा मः नःस्को थाम्पु लाम्तो खाता थे । खुन्तोलोये हुङ् योउमि नावादे गुदेल्पिक नाम्लु तातेक्सा थे । हुङ् योउ जो दुर् मान्तेइप् दोसो लुङ् सोङ् लाप्तो होपोतोङ्मि थेम्ला अन्वादे नावादे मः दुर्चि थे । अन्तोङ्ना अन्वादे पिल्मो, नावादे नाम्लु छुबुरि छुवा थे । खोरो दोसो सियाखात् लो तोःस् बिःचि लो खोलोःङ् बोन्छो लक तुवा थे ।
दुङ् खाता खाता लो मिस् छासा, खारुवा मःप् सर्ताे खाता थे । खन्सा हुङ् योउमि अन्वादे नावादे तुवाक सिःछोचि, सुमान्दिचि वात्ताम्छा मत्तो खाता थे । येनाम्पि योउ प लो दुप् युवा हो हुङ् योउमि लाम् हायाम् दाप्पा मतो खाइ थे । खन्सा मिचा जोः मान्दुर्चि थे । अन्वादे नावादे मः मान्दुर्चि थे । था सो बो मान्लेस्चि थे । खन्सा सतिपुस् पिल्मोला नाम्लु खाइ मान्दुर् थे । नाम्लु ला तोःस् बिःप् नोक्छो सो पिल्मो तान्ते मान्दुर् थे ।
हुङ् योउ जोः मान्दुर्चि कप्का लाछोछा लो नोक्छो सो बोन्छो लःम् मान्दुर्चि थे । खन्सा इक्लेइ निस्थलाकङ् बुबु नेछो तुस्बुइचि हुङ् योउमि अन्वादे नावादे चाइ मःस् बात्ल छुवा थे । चाइ छुवा लो पिल्मो तुप्आ सतिपुस् मःम् बोक्सा थे । खेना नाम्लु तुप्आ तोःस् बिःम् बोक्सा थे । खुङ्कला मेक्सा पिल्मोचा तोःस् मःम् होक्सिचि थे । खेना नाम्लु पोस्चा सतिपुस् मःम् होक्सिचि थे । हेप् थोप्मि छाःचि – छेन्हो, देउराम् नाम्लु लाम्पा चोचोलु खाताना तुवा थे ।
इन्द्र होनित्तिम् हिदु मताना होक्सियि । रोबुम् हिदु तुवा लो कुलु गुस्खम्मि देप्क चाइरिङ् कप् छुवाना केइ कुलुम् तोनाम्पि हायाम् निछिमा मक तुवे ।